HeroInvestmentClub

“港股存暗湧”

2008-01-26T11:32:00.000+08:00

港股今個星期十足十似玩緊笨豬跳，跌完又升，升完又跌，跌完又可再升，一個星期內好多散戶比俾d大戶幾“巴”幾“巴”咁打落去，打到眼都突晒。就算您頂得住週二個暴風都未必能夠頂得住週四午後的雷雨，全週高低位超過3,500點，但全週收市只比上週下跌79點，問您死未。
雖然港股週五已接近全週高位收市，但英雄個人認為下週港股確實存在不少暗湧。
恒指由高位(31,958)回落至本週低位(21,709)已超過10,000點，而由低位反彈至本週收市位(25,122)已反過34%(3,534點)，幅度上已足夠完成一次較象樣的反彈。
而下週三為期指結算(30日)，英雄個人認為近日恒指大幅反彈，除由FOMC突如其來及大幅減息刺激之外，亦不排除好戶大挾淡倉所至，因此英雄個人認為於期指結算後之走勢極不明朗。
同時近日英雄認為股票市場信心十分碎弱，只要有任何負面傳聞已能嚴重打擊投資者情緒從而令股市急速下跌。
上星期最觸目的新聞除FOMC大幅減息外，另一則必定為SG因其一交易員之詐騙事件而急需於週一為詐騙交易平倉從而帶動週一歐洲股市急跌及亞大區股市於週一及二急跌。換句話說即如不計及此因素，週一歐洲股市表現可能判若兩人。因此市場猜測FOMC於週二晚開市前之減息舉動可能由此所致，從而令市場質疑FOMC之能力。同時上週市場已預期FOMC於下週議息會議時會再次減息25bp至50bp，因此減息預期相信亦已反映於近日股市大幅反彈中，但如FOMC認為其上週減息幅度實為過大而決定下週暫緩減息，相信此將成為另一造淡藉口而令股市回落，因此英雄個人認為下星期不應急於入貨，宜觀察為上。
當然，英雄都希望自己過於敏感，期望下週股市能持續造好，令各投資者能開開心心過新年。最好恒指能於過年前後重回33,000點水平，令大家可再次見到『股神再生』！(但如果股神再生，咁佢個大仔又點算呢？)

『成也債券再保！敗亦債券再保！』

2008-01-24T14:51:00.000+08:00

大家可能會想英雄現時先咁講已經太遲。無錯！如果我用來解釋美國次按爆破的話就當然太遲啦，但如果我係用來衡量美國次按危機可否到尾聲呢，咁應該唔會太遲掛？
英雄之前係『神即係神！』篇中提過畢菲特係美國主要債券再保商叫緊救命時佢走出來自己開一間新的債券再保公司，其實英雄當時已想緊點解佢唔直接係市場買一間？但昨晚係一個電視節目中比孫柏文一語道破，相信個原因係個d主要債券再保商真係好唔掂，買佢地返來隨時加送幾個炸彈比您，條數可能都幾“come”計。
看看美股昨晚表演就知，由早段跌過100點至近尾市倒升約300點的主因係市傳美國New York State Insurance Department與美國銀行界會面，希望能幫個ｄ債券再保商融資，令佢地可穏定及保持評級。如果呢單野成功，英雄估計將大大提高市場信心，當然如果殊仔可以係佢個只懂派錢的USD1,500億方案中考慮向個ｄ債券再保融資商提供政府擔保咁就真係無得頂啦 (好似英國向Northern Rock提供擔保一樣)，如果似咁，英雄個人相信問題已近尾聲，如果唔係...........英雄覺得『the show must go on！』

再次購入建設銀行！

2008-01-22T18:05:00.000+08:00

短短只係兩個交易日，恒指只跌左3,444點，呢兩日對英雄來講似睇show多d，因為我已於上月沽晒貨(咁樣講好似好勁咁，其實沽貨時都有loss，所以正確來講似stop loss)，不過好彩之前走晒，唔係而家『真係唔知點算羅』！
不過係一月個跌浪英雄都有損失，就係上星期三係HK$6.00以下購入的建行。其實英雄都覺得買得唔錯，話晒上星期收市都有PROFIT，不過真係無想過這兩天全球股市跌到四腳朝天。建行當然都唔例外啦，兩天累跌19%，英雄只有無奈咁講一句：『他X的！』講完後就決定於HK$4.90再購入少量，理由唔再講啦(因以前講過)，但有一樣野英雄可以肯定的係，我真係覺得佢物有所值，同時這兩天個市比我覺得似係PANIC SELLING多D，但如果短期看錯，大不了又講多句『他X的！』羅。

神即係神！

2008-01-22T13:58:00.000+08:00

近來大家除左聽得較多個d受次按影響而股價大跌之外國銀行股外，應該開始聽到一d有關美國債券再保險商因受評級公司下調信貸評級而股價大跌的新聞，比較觸目如下：
- ACA Capital Holding 被評級公司下調其評級由A至CCC
- 美國第二大債券再保險商Ambac Financial Group被評級公司下調其評級由AAA至AA
- 美國最大債券再保險商 MBIA正被評級公司考慮下調其評級，現時為AAA

其實當此類型債券再保險公司評級被下調時會再對美國金融市場造成重大衝擊，因為個d原先由佢地擔保的債券評級亦跟隨保險商佢地本身的評級轉變而下調。雖然表面上只係評級轉變而並非間公司倒閉，但其影響一d都唔細。個問題的中心係有不少的機構投資者，特別係佢d本身個investment objectives係保守型的如大學退休基金等，佢地對投資債券的要求較高，特別可能係只能投資擁有AAA投資級別的債券，因此當佢地持有的債券評級被下調時，佢地便要沽售離塲，所以會令此類型債券價格下跌。而同時係現時credit crunch的時候，此類債券更乏人問津，因此更令其價格下跌。再加上由於那些債券再保公司評級被下調，從而令不少的美國公司及地方政府較難以較低成本獲的資金，因此將再加劇信貸緊縮的問題。

但講到呢度，英雄所講的好似唔係好貼題，其實當然唔係啦。英雄想讚的當然似股神啦，不過唔係四叔 (呀！話時話，都無見四叔好耐啦，英雄真係想聽聽四叔的高見) 而似畢先生。佢早排係佢管理的巴郡下面成立左一間債券再保險公司名為Berkshire Hathaway Assurance Corp.，呢間公司都係做債券再保險，但係個分別係.......當身邊間間都中招時，佢現時先開始；當身邊間間都被調低信貸評級時，佢保持AAA評級；當身邊間間都被好難再接生意時(因無AAA評級)，佢大把發展空間(重可以收高D保費同選擇質優客戶)！咁您地話係唔係要真心咁講一句：『神即係神！』

買入建設銀行

2008-01-17T10:29:00.000+08:00

英雄昨天膽粗粗咁係HK$6以下買入左少量建設銀行(0939.HK)，買入的原因唔係因為佢已跌左超過3分1，英雄覺得呢個並非購入的理由，而我真正買入的理由係我個人認為佢已具備投資價值。

以其之第三季業績中看到，建行第三季EPS為RMB0.1，頭三季EPS共為RMB0.25，我假設其第四季之EPS不及第三季，只有RMB0.08，咁即係話我『估』佢07年全年之EPS為RMB0.33，化做港元計約HK$0.3548，以現時HK$6.00計，其07年PE『估』計低於17X。雖然中央今年決心收縮貨幣政策，但大家看看其亦批准今年新增貸款幅度有15%，同時亦開始漸漸放寬國內商業銀行發展保險業及基金業務，因此英雄相信其08年之盈利亦具備一定上升潛力。根據其07年中期報告所示，其中期純利上升47.5%，而EPS上升50%，因此英雄以非常簡單之分析方法，只假設其08年EPS只升30%，不計及人民幣上升動力，即其08年全年EPS『估』為HK$0.46124，咁即係咁英雄自己『估』佢08年預測PE為13X。根據昨天中銀國際對HSBC之新目標價HK$117.5計，亦以HSBC 08年P/E為11.5X計算，因此英雄覺得建行已具備投資價值，話晒應該都無人質疑國內銀行股不具增長潛力，因此吸納作中線投資用途。

金價可見USD1,400一安士！

2008-01-07T14:00:00.000+08:00

英雄今日打開報章，見到曹先生話金額可上見超過USD1,400一安士，英雄即刻眼都突晒，即係話金價重有最少60%潛在升幅(上星期金價收報USD859.20)。

其實英雄自已都看好金價走勢，除左傳統上之原因如美元走弱、新興國家人民收入上升帶動需求及抵抗通賬壓力外，我亦認為現時有兩個重要原因亦令金價走强。首先就係新興市場的需求，我這裡指的需求係各中央銀行之需求。由於以往不少央行之外匯儲備中均以美元為中心，但由於美元不斷走下，以致各央行均需分散外匯儲蓄以減少風險，而黃金亦係佢地增持的重點之一，因此這個需求不容忽視。另一就係地綠政治風險，近年這個名稱經常係報紙到可以見到，傳統來講，當地綠政治風險上升時均有助三類資產，分別係美元、瑞郎及黃金。但正如前所講，美元現時表現“好”成咁，試問邊個願意持有美元作地綠政治風險的資金避難所，所以令持有黃金大行其道。由於以我所知黃金較難有代替品，困難程度比石油更甚，因此造成黃金走勢持續上升，以英雄之智慧只有信心估計金價可達USD1,000一安士以上，但可否見USD1,400就請各位自行衡量啦。

全聚德 - 另一A股神話

2008-01-04T17:07:00.000+08:00

英雄今日係一份免費報紙中見到一段新聞都幾有趣，係有關一間百年老店，於國內甚具名氣，同時亦於香港設有分店之『全聚德』(002186.SZ) (聽聞出名係北京田鴨)。

其實餐飲業上市係無什麼出奇之事，就好似上年於香港上市的稻香(00573.HK)一樣，不過最大分別係於個股價表現。

稻香於2007年6月3日於香港交貿所上市，招股價係HK$3.18，今日收市價係HK$2.73，P/E17.22X，即下跌左14%有多，仍然係公海到潛緊水。
全聚德於2007年11月20日於深圳交貿所上市，招股價係RMB11.39，今日收市價係RMB71.42，呀！SORRY個價係尋日的，今日個正確收市價係又漲停板(即單日上升10%)報RMB78.56，P/E149.38X。無錯，係升左接近600%，佢唔單只升左上天，佢簡直係出左地球，跟楊利偉一樣去左月球。

請原諒我的無知，我真係唔知點解個分別係咁大，trade緊個P/E可以有咁大分別。雖然我明白內需股係現時之star，但係是否强勁成咁，我又唔知。雖然我明白Historial P/E唔可代表未來，因為增長可能好大，但係唔係個增長可以去到科網股的P/E水平，我真係唔知。另外再簡單考慮下近來一個大熱topic，就係農產品價格及家禽價格上升，咁即係話佢地個生產成本會越來越重，佢地能唔能夠全數轉移到消費者身上，我又係唔知。點解國內人現時叫全聚德做"Crazy Duck"，但仍然瘋狂咁繼續買佢，我都想知。雖然有咁多野我都唔知，但有一樣野我係知的，就係我買唔到，只係能夠對住隻鴨.......流口水！

渣打銀行又一“傑/杰”作！

2008-01-02T15:21:00.000+08:00

終於都放完假返來啦，又開始新的一年，英雄謹在此祝各位新年進步、心想事成、身體健康、股運亨通。

於放假期間有段新聞英雄都幾有興趣，就係淡馬錫於12年中再度更持渣打銀行股權至18%，逼近金管局對發鈔行設定的上限(20%)，此一增持亦係其07年內之第七次。其實英雄於一衆傳統銀行股中(不設中資銀行股)一向都看好渣打，除左因為英雄將人生第一次俾左佢之外(開第一個私人戶口)，亦因為我覺得佢係近年個定位幾好。就係集中發展新興市場，唔係好似大笨象懶勁咁話要做到三頭車馬(歐、亞、美)，您估要征服全世界咩。正所謂高增長的地方當然係於新興市場啦，唔通係美國、德國咩，所以有句說話我覺幾好：『贏了世界又如何』！所以係07年7月時美女同英雄講話想買匯豐，因為息口好同P/E唔高，英雄第一個反應當然係反對啦，第二就係叫佢買渣打。個決定正確與否呢，您地估下。

雖然上述消息英雄覺得幾正面，但睇多段news後英雄有d擔心。段news係話渣打終止出售印度基金管理業務予瑞銀，原因係印度當局唔批准，而渣打正尋找新買家。英雄擔心唔係佢賣唔到個業務，擔心係佢又賣業務。雖然短期而言印度個經濟可能熱左D，但長線我相信印度大把發展空間，無理由賣左呢個仔呀。渣打呢個動作令我聯想返以前渣打賣左香港個財富管理業務俾人，重要限左佢數年唔可以發展呢一個業務，令佢係香港個財富管理業務發展過程中成為輸家。又令我聯想起佢唔起點解將自己個總行賣左俾人，成為一時笑話。英雄真係唔知佢今次又點攪，為咩要賣印度基金管理業務出去，希望佢今次係傑作而唔係杰作啦！

美國真係會放慢減息？

2007-12-18T14:57:00.000+08:00

朋友B問英雄，佢話上星期五美國公佈左D較靚的數據，令市場認為通賬壓力又大返，因而美國會減慢減息步伐，不利股市。

其實英雄覺得個講法都幾特別。特別在於之前數據差D，就擔心對經濟唔好，咁股市跌羅，OK。但數據好時又擔心減慢加息步伐，咁樣又話跌。咁即係要D經濟數據好定唔好先！想到這裏，英雄諗返起以前係學校時代一個lecturer講的一個睇法，佢話好多時市場裏D投資人係找理由去解釋個市場點解咁走，咁即係話佢地有時係可能係是但找D原因去解釋股市升跌，所以不能盡信！

講返減息步伐，英雄完全唔覺得美國會因為公佈左一D較好的經濟數據後會減慢減息步伐，主要原因係我相信美國現時最需要解決的頭號敵人係次按所衍生出的信貸危機。雖然減息未必一定能解決此問題，因為當中涉及信心問題，但起碼會有幫助。

英雄覺得有幫助的原因係減息有助刺激通賬，而通賬亦助資產價格上升，從而舒暢樓價持續下跌壓力。英雄假設就算減息未能令美國樓價上升，但只要令樓價企穏，此亦有助投資人對評估次按投資的風險，因此英雄唔相信美國會減慢減息步伐。

CPI升真係要加息?

2007-12-13T11:12:00.000+08:00

英雄前晚聽新聞知道國內11月份CPI按年率計上升至6.9%為過去11年來最高，當中主要由食品價格按年率計上升18%帶動，佔CPI上升年率中之5.94%。當報導完這個fact後個主播就話由於CPI上升至多年高位，因此大大增加人行加息壓力以壓抑通賬。

本來通賬惡化，央行加息壓抑係自然不過的事，但英雄聽後就覺得好"UN"耳。英雄覺得"UN"耳係因為英雄諗唔明加息對控制食品價格有何幫助。大家都知道由於糧食供求出現失衡，以至糧食價格大幅上漲，個問題起源係唔夠糧食供應，所以英雄唔明加息會有什麼幫助。英雄反而覺得如果係因為咁樣而加息，除了無特別幫助外，反應對現時人民幣面對不輕的升值壓力下有點兒火上加油，特別係現時美國正值減息期。

當然基於中央強調明年的貨幣政策會轉向緊縮，人行加息行動增加確係市場預期，只不過我較相信中央會以政策手續去對付這個通賬元兇(即糧食價格)的機會較高。英雄估計中央主要會以補貼或稅務優惠等政策去幫助農業發展，從而舒緩糧食價格升調。不過，這些只係我自己的估計，英雄唔係政策制定者，所以估錯的話唔好話我。

淺談樓市

2007-12-12T15:18:00.000+08:00

近日聽不少朋友及大行講話明天樓市看升多少多少，因而要買樓作投資，主要原因包括負利率情況持續、薪金上漲、北水南調等等。其實英雄都幾同意佢地的講法，所以係較早時(1年前)已因應自已的情況，購入了一個單位作自用。好彩地雖然個單位唔係豪宅，但現時都算有少少升幅。但英雄覺得以香港的物業，特別係普通住宅作投資對象風險其實較高。

英雄唔睇好香港普通住宅樓市前景原因為下：

我唔覺得香港係「地少人多」：大家想想現時香港D住宅大廈，正所謂要幾高有幾高。特別係一D舊區重建項目裏，新建成的單位數目比舊有的多幾陪，甚至幾十陪。咁即係話供應其實越來越多，重未計現時多幅空置的靚地，如舊機埸、舊北角村等等，您話我地係唔係重要相信香港係地少人多呢？
係需求方面，無錯現時係多左D國內人來港置業，但其實佢地較集中兩類型樓宇，第一類當然係豪宅啦『我所指個D豪宅係位於傳統豪宅區，而唔係只係個名有豪字個D喎』，話晒現時不少國內富豪來港投資，唔住豪宅?唔通住個一仟幾佰呎屋咩。第二類係個D較近國內邊境的住宅，因為方便佢地往來呀，唔通要我住大古城但日日返深圳辦工咩。至於香港友，講真，經通97年金融風暴、科網股爆破、911、沙士後，您估重有幾多財雄勢大的人呀。就算個D所謂什麼少年股神、街坊股神等等，係今次呢一個大升浪裏賺到笑，您話有幾多人呀?您估佢地會買幾多十萬個單位呀?實際上會製造到幾多需求呢?再細心想想，經過咁多次股市升跌洗禮而仍站立得住的投資高人及個D我們尊敬的所謂股神，既然佢地咁勁，如果佢地睇好香港住宅樓市，您估佢地買左貨未呀?佢地駛唔駛等到現時個個都話睇好香港樓市時先買樓呀?所以需求有幾多，我真係唔知！
除供求以外，我地睇睇香港的地產發展商，佢地個個積極合作發展住宅，不過係國內住宅。個個都話要提高國內地產收益比重，以佢地係地產方面擁有咁專業及獨到的經驗及視野，如果香港地產真係咁好境，無可能唔大力發展，點解個個都極力發展國內呢?咁係唔係話國內地產前境好過香港呢?
雖然唔少人同我講國內加強宏調喎，咁咪對國內房地產不利。絶對同意，但想想點解中央要加強力度。點解美國政府同英國政府唔加強對當地房價控制的力度?
最後英雄覺得物業投資並非短線投資，主要因為涉及的開支較大、買賣雙方配對時間較長及物業本身係咁高流通的投資產品，因此如投資物業唔預計超過10%盈利不如唔好買。但如果要10%至20%回報的話，係股票市場裏去揾定係於物業市場裏揾難?您地話。

但係英雄明白什麼叫做『襯勢』，既然個市場裏大部份人咁諗，咁當然要諗諗計啦。因此英雄早於9月24日時以當時高位HK$7.81購入美聯集團(1200.HK)。英雄購入的原因係心想，既然越來越人咁諗，即係話物業交投量應該會上升啦，以美聯此類公司盈利主要由交投量帶動之公司，正所謂唔理您地班物業投資者購入物業後有無錢賺，最緊要係有交投，何況就算樓價即將見頂，但都唔關美聯事，因為物業價格損失並唔係佢承受，所以英雄當時決定購入上述公司作為替代品。

07 Oct 2007

2007-10-08T12:23:00.001+08:00

上週港股收報27,831點，全週升689點。上週港股走勢十分波動，週二長假期後之開市日全日上升1,057點，但港股於週三及週四出現較明顯之調整，特別於週三港股出現較大之波幅，全日波幅超過1,600點，週三及週四兩天港股合共下跌1,226點，但週五則大升858點。雖然有不少評論均認為現時港股已處高位，大跌市隨時一觸即發，但由上週港股表現我們認為現時港股之承接力仍然強勁，特別於外資多翻減持下，港股仍能上升，如中石油(0857.HK)經股神多翻減持下，股價仍能突破上升，由此可見一班。同時港股上週兩天大跌市中，跌幅較明顯之股份均為之前升幅較大之股份、如中資電訊股、石油股、航空股等，但當天仍有不少佔恒指成份股比重大之股票如、匯豐銀行 (0005.HK)、工商銀行(1398.HK)等相對落後之股份於天跌市日仍能上升，由此我們相信港股上週之跌勢較似穫利回吐居多，並非走勢較差。同時港股現仍有『北水南調』及中國投資公司之利好因素推動下，我們仍對港股持樂觀態度。

十月三日：很久不見的跌市日

2007-10-03T17:05:00.000+08:00

英雄都很久沒有update過呢個blog啦，真係懶惰，不過英雄覺得今日係時候要update下啦，特別係遇著一個近來好久都未見過的跌市日。

今日恒指都幾有趣，開市後跌過200多點，之後又掉頭回升超過600多點，但中午收市前又收歛返d，但下午開市後再跌，最多跌成900多點，埋單收市跌720點，全天波動1626點，嘩都幾激！

英雄睇下其他地方，發現其他地方個股市都唔係好大變化，好似AV國今日重升0.9%，其他股市則上下變化不大，執筆時歐州股市上落又係細，無什麼特別。外匯方面，英雄較為擔心的AV錢又唔升，吓點解呢?英雄再細心少少望下的股票，英雄發現今日跌得較多的股票集中於近來升幅顯著的股票身上，如電訊股、石油股、航空股身上，反而近日升幅較少，但佔恒指成份比重不少的股票如匯豐、恒生、工商等等都不跌反升，以匯豐最明顯。

英雄覺得今日個市比較似係profit taking多d，而唔係較差，特別我地重有『直通車』及中國投資公司這兩條大水喉。同時今日港股成交特破2000億，欠1多億就夠2100億，英雄根據過去呢個多月外資的行動估計，相部係外資高位沽貨居多，但如果以沽咁多貨，個市唔應該跌咁少，因此英雄估計有不少貨由國內水喉買返，支持返我地香港同胞。

短線以言(今個星期)，英雄相信恒指仍有下調空間(以今天即月期指低水成225點估計)，但年底前英雄仍然看好港股表現，比較相信今天係技術調整居多。

註：以上看法只係英雄自我猜測，並無任何投資建議成份在內，敬請留意。

大跌市: 01 Aug 2007

2007-08-01T20:36:00.000+08:00

英雄放幾日假，個魚缸就亂成咁，唔講都唔知自已都有D影響力 (咁笑咁講吓)！好，咁等我又吹下水先！

香港個魚缸於本週呢三天都幾大浪，特別於週二上升超過 400 後於今天則大跌超過 700 (曾跌超過 900，嘩！ ) ，原因話係花旗國次按問題喎，好彩英雄之前都話要飛左D非天長地久的darling，如果唔係就真係一身都係。

短線睇，英雄真係覺得花旗國D次按問題本身應對魚缸影響不會太大，話晒D釣魚佬早已預左啦，同時以花旗國最近公佈之通脹相關數據顯示通脹都温和，咁即係話如果當次按問題漸趨嚴重時都有子彈去減息啦。但英雄比較擔心係AV國D money，英雄認為佢除左影響英雄本身外(指d AV) 短線都會幾影響魚缸，因為如果佢地D money升得勁，都幾影響carry trade 同市場游資。近期花旗國D money兌AV國D money由接近 125大幅上升至今天 117.70 左右，雖然咁升法係絕唔會影響英雄買AV的意欲，但對借AV國D money而放落魚缸D兄台就...........！因此短期英雄會望實AV國D money變化。

中線而言，英雄仍對魚缸仍抱打不死態度，主要由於大部份派左成績表或吹定水的魚表現都唔錯，而現時money仍算充裕，特別是阿爺放水(QDII)。英雄諗.......... 22,000係第一個心理及支持關口，正如今日下午魚缸跌至貼近 22,200 點位置時見不少魚佬都買返D魚，令魚缸跌少D。因此英雄會考慮係22,000追返D中線darling。

26/07/2007

2007-07-26T17:20:00.000+08:00

近兩日香港個魚缸都幾出人意表。今日英雄一心諗住阿爺咁錫我地，又放寬D保險公司可投資比重由5%升至15%，睇報紙話預計呢支新水喉會有成3700多億。雖然香港唔會完全食晒，但都一定受惠啦，因此英雄覺得個魚缸點都會升返200點左右掛。英雄就即係英雄，個市係朝早又真係最高升成195點，英雄心裏勁 (指自已)。真當英雄於早上沾沾自喜之時，望望下個指數，咦！點解越做越低？上市收市只升70多點，真奇！

英雄食完午飯返到公司望一望，嘩！點解D期指低水過百點呀，發生什麼事呀？嘩嘩嘩，開市後個魚缸越跌越多，最多跌成約300，何解？於是英雄馬上收下風啦，只係知道除阿爺外，AV國、阿扁同高麗参都跌親，個個跌1巴仙左右，英雄心想，唔係呀，發生咩事呀。再收收風，D人話怕左AV國的money會繼續升，咁當然又會令大家想起D carry trade啦，同時又怕花旗國的次按發作喎，更令英雄感到新奇係話印尼地震喎。查實英雄真係唔知信邊個好，不過英話心想.....唔好煩當係調整算啦，個魚缸都慢慢慢慢咁返上去啦。個魚缸最後收23,211(跌151)，重企係23166(10天average)之上，算啦，當睇唔到，明天再算。

25/07/2007

2007-07-26T12:06:00.000+08:00

花旗市因次按及公司業績欠驚喜而下跌200多點，因此英雄覺得個香港個金魚缸點都要跌D啦。『個魚缸開市時跌200多點，正路！唔......跌得100零點，都OK！嘩！跌得幾廿點，唔係呀！雖則話現時港股無以前咁受美股影響，但唔係唔受喎，千其唔好倒升呀，唔係英雄就真係唔知應該點做啦。好彩......跌返110點收市，咁都無咁驚！』
查實英雄唔係改變對後市的睇法，只係希望個市重可以理知D，唔好咁快就咁瘋狂，咁快就玩完。話晒個市升得咁急，如果就係來個似樣D的調整，1000-2000一點兒都不過份，英雄重手緊，所以希望個市唔好咁快完，please!
呢兩日見到D中資保險股都幾勁，降存款稅率，當然對佢地有利啦，話晒保險公司個PORTFOLIO中存款類都佔不少比重。英雄痛恨於法$18元走左，重以為好醒咁可以低D撈返，點知‧‧‧‧‧真係低D，不過係英雄！因為呢件事，令英雄明白如果被認為係長線HONEY，就千其唔好扮醒咁想range trading，抱住可高沽低買心態，因為隨時抱憾終生！

#820：How Come！ (23/07/2007)

2007-07-24T00:23:00.000+08:00

今日#820呢個佳麗發威俾英雄睇，係要英雄對於自已唔選佢的決定而後悔。無錯，英雄確實有點兒後悔，後悔自已扮清醒，唔記得曹大俠經常傳授俾我地的心決：『有智慧不如襯勢』。好似曹大俠咁有智慧的高人都認為應該襯勢，何解英雄呢個無智慧的江湖人居然唔懂襯勢，係要扮有超高智慧，您話，係咪要後悔！

不過去到呢個階段，英雄更加唔放呢位佳麗係眼內，主要原因係我唔會俾7成premium去買佢個名。呢個佳麗剛剛先出市場，我完全唔相信佢買好晒D新衫新裙去見人(未買齊貨)，咁即係話佢個market price的升幅絕絕絕......絕大部份唔係因為佢本身的內涵(NAV)升左。咁即係話............大家俾左唔知幾多銀去買佢的另類的價值，例如個fund manager靚仔、獅子行個大名夠英、#820個『林巴』夠lucky等等。恕英雄唔識評估呢D alternative information的價值，英雄只知個NAV要升7成先fair，以現時個market咁，英雄唔知要幾耐。基於上述原因，英雄覺得佢扮高貴多過真高貴！

個香港股市同國內股市係阿爺出雙招後仍然做高，特別係國內股市。好似英雄之前咁講，我對個市的前景仍然樂觀，但千其唔好『蝦』阿爺老或仁慈，唔理佢的說話，如果唔係好似之前都試過唔聽阿爺話，佢好快又出另一板斧來嚇下您，咁就唔好啦。所以英雄決定把部份非長線投資係短期內清清佢。

A股基金

2007-07-20T16:49:00.000+08:00

今日獅子行隻新A股基金隆重登場(0820.HK)，唔知係唔係因為大家對A股市場前景樂觀，定係佢個基金經理黃子鏵出名，定係獅子行個名夠堅，隻基金今日升左20%，收報HK$12，都幾喜出望外。連同之前中仔掛牌隻標智(2827.HK)，您地都咪話D 『A股基金』都真係幾標緻。

英雄對這兩隻基金都態度都比較冷淡，所以『抵』我係呢兩隻標緻野上攞唔到D游水。英雄對呢兩位佳麗唔睇好的原因主要有兩大類。

(1) 唔鐘要佢地(特別係獅子行個隻)係個金魚江裏面比人望衰晒 (意思係唔鐘要D基金係交易所上市)。話晒如果英雄睇中佢地的話都希望本住長線擁有的心態，希望可跟佢地天長地久 (咁講下啫)，另外最重要係希望佢地能俾返其本身公平的價值俾我，老老實實咁對我。但由於佢地係個金魚江裏面，好容容受其他野影響佢本身的價值，因此好容易出現市價高於或低於佢本身的價值(NAV)，咁即係話我要面對多一個變數，多一個風險。如果我買了後，除左其本身NAV除值外，連個溢價都越來越大，咁雙重著數就當然無得頂啦。但如果剛剛相反，雖其本身NAV升值外，但個溢價則越來越少，咁容乜易賺少左或甚至有損失架，係咪？

(2) 英雄短期較看好H股多於A股。其實兩者都能反映返國內經濟的前景，之但係英雄覺得現時D政策較有利H股發展。首先唔需解釋的係QDII支大水喉啦。其二係現時國內十分鼓勵香港上市之H股、紅籌甚至藍籌回歸。我地都知道國內股市之所以能夠好似火箭咁，除左資金多到您唔信外，主要係『僧多粥少』 - 對股票的需求大過供應。如果我現在同您地班僧侶講，現在俾多D粥您地之前，重比飯、麵、饅頭、曲其餅您地，咁試想想的粥重有幾多升值潛力。另外如果我長線看好祖國市場，但H股的股值比A股低，咁作為長線的投資者會點做？會唔會棄A從H呢？

所以基於上述原因，英雄自知係一個不懂溫柔(對A股)的投資者，所以無辦法不跟A股基金小姐說聲：『對不起，辜負您啦』。

開blog日 (29/07/2007)

2007-07-19T16:52:00.000+08:00

今天係英雄個investment blog開張的第一天，咁橋個大市今天又升返175點(收23,016點)，唔理什麼原因，就當係個大市幫英雄個新blog興祝啦。既然係第一篇，咁就講下英雄對個大市的『行貨』睇法。

近日大市成交明顯細返少少，個市的氣氛又靜返些少，我想原因可能係暑假又來啦，都係時候放下假、避下暑啦，咁熱。，再加上之前個市升左咁來，如果以前有入市的，應該都拾唔少，休息下都要啦。至於個批未入市的，我想都唔敢入住啦，係咪？其實英雄亦覺得個市明顯於短期內欠缺上升動力，除左少了那批放左假的投資者外，主要係怕外圍有的什麼動靜會推低個市，例如明日我國公佈的經濟增長數據啦、花旗國的次按問題、又或怕AV國的carry trade平倉問題等等。

依英雄自已的見解，我比較關心我國的經濟增長數據。主原係現時港股明顯較受國內政策的影響，多於受花旗参及AV影響。花旗参的次按，老實講，我覺得有近攪，但係花旗参應該唔會即時揭晒D野比大家睇，因為英雄相信個鑊唔細，牽連亦可能較廣。所以花旗参會慢慢、慢慢咁揭D、揭D，咁減低個影響，manage大家個expectation。至於AV國D『carry trade平倉問題』，老實講短期影響大過長期影響，因為我對AV國個經濟睇法係：Sorry，丁點兒都唔睇好！現時AV國想個經濟好D的話，暫時都要靠弱money，所以點解我覺得短期影響大過長期影響。

至於我國........明顯地國內經濟的增長動力近來加快左，係個咁有計劃的國家內，我想都係時候D領導要做些野來緩和下個經濟，所以我覺得領導會係今個週未拎些政策出來給各位望望的機會好大。雖則係咁，英雄覺得温領導比之前朱領導較體恤(股)民情，所以不會拎太多或太勁的政策給大家欣賞，所以預期影響會比較短暫。對香港的後市英雄因此比較樂觀，較認同部份分析員估計見25,000之目標。因此英雄就算知道老土都咁覺得：『逢低吸納』 - 自信隻牛重係香港處陪『盈盈』、『樂樂』食緊草。